1 Tawarikh 16

Iatonna baami tau tama tu pattinNa Puang Matua napatorroi dio tangnga tenda, tu napabendananni Daud, napemalarammi tau iato mai tu pemala’ ditunu pu’pu’ sia pemala’ kasalamaran dio oloNa Puang Matua.

Iatonna upu’mo tu Daud umpemalaran pemala’ ditunu pu’pu’ sia pemala’ kasalamaran, napassakkemi tu to buda tete dio sanganNa PUANG.

Anna taai tu mintu’ to Israel, la muane la baine, pantanni roti sisangbatu, duku’ sisangira’ sia deppa bua anggoro’ simisa’.

Napamanassami tu ba’tu pira-pira tau dio mai to Lewi la menomba dio tingayo pattinNa PUANG, kumua anna tau iato tontong ussa’bu’, umpangke’ sia umpudi PUANG, iamotu Kapenombanna to Israel.

Iatu Asaf iamo pangulunna, nadampi’i Zakharia; sia Yeiel, Semiramot, Yehiel, Matica, Eliab, Benaya, Obed-Edom na Yeiel umpannoni oni-onian, iamotu ma’dandi sia ma’katapi,

sia Asaf ma’taa’-taa’, sia Benaya na Yahaziel, to minaa, tontong ma’tarompe’ dio olona patti basseNa Puang Matua.

Iatonna allo iato bunga’na napasan Daud lako Asaf sia mintu’ siulu’na la umpudi tu PUANG, nakua:

Pudimi tu PUANG sia meongli’komi ussa’bu’ sanganNa; Pakaleleanni tu penggauranNa dio lu mintu’ bangsa.

PenanianNi sia pakendekanNi pa’pudian; Pokadai tu sininna penggauran kalle-kalleanNa.

Massattuangkomi diona sanga maseroNa; Mintu’ to undaka’ PUANG sipatu la sende batu ba’tengna.

Anga’i tu PUANG sia tuntunni tu matoto’Na; La tontongkomi undaka’i ammi pellambi’i oloNa.

Kilalai tu mintu’ tanda memangngan mangka Napogau’, Sia mintu’ tanda kalle-kalleanNa, Sia mintu’ panglampakNa tu ombo’ dio randan pudukNa,

E mintu’ tarukna Israel, taunNa, E mintu’ bati’na Yakub to Napilei langsa’.

Iatu PUANG, Iamo Kapenombanta, Sia mintu’ pa’paolaianNa salu lalo lan mintu’ lino.

Kilalai tu basseNa tontong sae lakona, – iamotu kadanNa tu mangka Napepasanan landa’ lako sangsa’bu osso’ns-

iamotu basse Napantok sola Abraham, Sia sumpaNa lako Ishak.

Iamotu basse iato Naarra’i lako Yakub la napoaluk, Sia lako Israel la napobasse tang leluk,

tu nakua kadanNa: La Kutekkenniko tana Kanaan, iamo mana’ disukarangko la mupoba’gi.

Attu iato tang marian, Sidi’ tonganri sia mempue’ bangri lan,

Tau iato mai ullelei simisa’ bangsa, Sia ke’de’ dio mai parenta senga’ male umpengkara’pai bangsa senga’.

Tang Naeloran Puang tu misa’ tau la umpandasa tau iato mai. Sia Napa’dikki duka tu mai datu diona tau iato mai.

Nakua kadanNa: Da mipata’pai lima tu mati’ to mangka Kutokko, Sia da mipogau’ kadakena lako mintu’ nabingKu.

Penaniammi tu PUANG, e mintu’ issinna lino, Pasitarru’-tarru’i tu allo Minii umpa’peissanan kasalamaran lu dio mai Kalena.

Pakaleleammi tu kamala’biranNa dio lu mintu’ bangsa, Sia iatu penggauran kalle-kalleanNa dio lu mintu’ sangpetayanan.

Belanna pasareongan tu PUANG sia pato’ tongan dipudi, Mandu metakuran Ia na mintu’ deata,

Belanna iatu mai deatanna mintu’ bangsa, kapenomban tang tongan. Apa PUANG Ia tu ungkombong langi’.

Dio oloNa tu tanda kabilangan sia kadipangkeran. Anna kapaan sia kasendean lan inan Nanii torro.

E pa’rapuanna mintu’ bangsa, palulakoi PUANG, Palulakoi PUANG tu kadipangkeran sia akui tu kuasanNa.

Palulakoi PUANG tu kamala’biranna sanganNa, Pennoloanni tu pemala’ sia menombakomi dio oloNa. Tukkukomi menomba lako PUANG umpokassa’ pakean maindan.

La ma’parondokomi dio oloNa, e mintu’ issinna lino: Bantang bang tu lino, naurunganni tang tibendon.

Melo ke sende paimanni, anna mela’tek tu lino, Sia la napokada tau dio lu mintu’ bangsa, kumua: PUANG untoe kapayungan.

La mongngo’ tu tasik sola mintu’ issinna lan, Melo ke parannu paimanni tu padang sola mintu’ tu denna dao;

attu iato mintu’ kayu lan pangala’ la unnarrak, Dio oloNa PUANG, belanna la sae umpaolai salunna lipu daenan.

Pudimi tu PUANG, belanna masokan Ia, sia iatu kamasokananNa tang tileluk sae lakona.

Sia la mikua: Rampanangkan, o Puang Matua, oto’na kasalamarangki, Pulungkanni sia lendokankan dio mai mintu’ bangsa, Angki pudi sanga maseroMi, sia massattuan lan kadipudiamMi.

Mintu’na kadipangkeran lu langngan nasang PUANG, Kapenombanna to Israel, tempon dio mai tontong landa’ lako attu situran. Namintu’ to buda ma’kada nakua: Amin, sia: Pudimi tu PUANG.

Napatorromi datu tu Asaf sola mintu’ siulu’na dio tingayo patti basseNa PUANG, kumua anna tontong menomba dio tingayo patti, susitu mangka dipamanassa keallo-keallo.

Susi duka tu Obed-Edom sola mintu’ siulu’na annan pulona ngkarua; iatu Obed-Edom, anakna Yedutun, sola Hosa iamoto ma’kampa babangan.

Apa iatu to minaa Zadok sola mintu’ siulu’na, tu to minaa, (napatorro) dio tingayo kemaNa PUANG dao inan madao nanii memala’ dio Gibeon,

anna tontong ke melambi’ sia ke karoen umpemalaranni lako PUANG tu pemala’ ditunu pu’pu’ dao inan pemalaran dinii mantunu pu’pu’ sia umpogau’i tu mintu’ apa disura’ lan Sukaran alukNa PUANG, tu Napepasanan lako to Israel.

Sisola tu tau iato den tu Heman sola Yedutun na iatu to senga’ ditonno’mo, tu dipamanassamo sanganna la umpenanian Puang, kumua: Pudimi tu PUANG, belanna iatu kamasokananNa tang tileluk sae lakona.

Iatu Heman na Yedutun umbaa tarompe’ sia taa’-taa’ la napake to umpannoni sia oni-onian la unggamarai penanian umpangke’ Puang Matua. Na iatu bati’na Yedutun iamo ungkampai babangan.

Iatonna attu iato pantan sulemi tu mintu’ to buda lako to’ banuanna, sia iatu Daud sulemo la umpassakke mintu’ to lan banuanna.